A Xunta de Galicia reprobou os plans do Goberno central de trasladar a sede do Instituto Oceanográfico a dúas Comunidades, entre as que non se atopa a galega, polo que critican que obvie o seu “peso e prestixio” neste campo. Nun comunicado facilitado pola Consellería do Mar, o Executivo galego lamentou os “bandazos” dados polo Goberno na descentralización do Instituto Español de Oceanografía (IEO).
Nesta liña, censuraron os seus plans –“coñecidos a través dos medios de comunicación– de trasladar as sedes de pesca e de acuicultura do IEO, “a pesar de que Galicia conta con dous centros, Vigo e A Coruña, que concentran un importante volume de actividade nestas dúas materias e é tamén a comunidade cos sectores pesqueiro e acuícola máis importantes de España”.
É por isto que defenden o peso e o prestixio que ten Galicia neste ámbito “como o maior aval para que a rexión puidese ostentar a sede do organismo dependente do Estado”. Lamentan que o Goberno “obvie” a capacidade e o traballo desenvolvido polos profesionais do IEO en Galicia e que avance, unha vez consumada a súa integración no Consello Superior de Investigacións Científicas (CSIC), “no desmantelamento dun organismo fundamental para o estudo do medio mariño”.
O Executivo galego rexeitou ademais a división en partes do centro e propuxo como alternativa a súa cesión á comunidade para “velar pola súa integridade”. Ante esta situación, piden tamén que aclaren as súas pretensións en relación ao IEO e que “adopte as medidas necesarias para reforzar o seu traballo, proceder ao seu saneamento económico e mellorar a súa estrutura organizativa”.
Cando se preocupou o PP de ningunha transferencia?, en 13 anos de goberno Feixoo ningunha transferencia. É Abel Caballero é demais mandos do Psoe a calar, para o que pintan é pesan no seu partido, é así lle vai a esta Terra, entre saqueadores é cómplices, como non mudemos as nosas opción políticas imos aviados.