Traballadores protestan en Vigo polos “incumprimentos” de Ambulancias do Atlántico

É a primeira das catro xornadas de folga convocadas.

Persoal de Ambulancias do Atlántico manifestándose no hospital Álvaro Cunqueiro de Vigo / CIG.

Uns 50 traballadores de Ambulancias do Atlántico protestaron este martes nas inmediacións do hospital Álvaro Cunqueiro de Vigo polos “incumprimentos sistemáticos” por parte da empresa dos acordos do convenio e de riscos laborais.

Así, na primeira das catro xornadas de folga que os empregados levarán a cabo, lamentaron a situación que viven dentro da compañía, que ademais, segundo fontes sindicais, despediu catro persoas, “sen dar explicacións”.

Ambulancias do Atlántico presta o servizo de transporte sanitario urxente como o programado e interhospitalario das persoas enfermas e accidentadas no ámbito territorial da área Sanitaria de Vigo. Este martes, mércores e xoves e o vindeiro luns, día 4 de abril, os seus traballadores están en folga pola situación laboral que viven.

Con todo, desde a CIG, que preside o comité de empresa, lamentaron que a empresa “non ten vontade de reunirse” cos traballadores para solucionar o conflito, xa que tras meses de protestas convocaron unha reunión xusto o día da folga á hora que estaba prevista a concentración (12,00 horas).

Tamén criticaron os servizos mínimos impostos para os transportes programados, xa que practicamente son do 100%, o que nega “de facto” o dereito a folga dos traballadores.

Neste sentido, lembrou que na anterior folga de 2019 o Tribunal Superior de Xustiza de Galicia (TSXG) acabou ditando que os servizos mínimos foran “abusivos”, pero cando a folga xa acabara e na actualidade “parece que se repite o mesmo esquema”.

En canto ao despedimento dos traballadores, desde a CIG explicaron que a empresa alegou unha “baixa do rendemento no traballo”, polo que desde o sindicato preguntan como se cuantifica ese rendemento. Ademais, non houbo “ningún tipo de comunicación previa”. Segundo lamentan, tratábase de empregados que “esixían os seus dereitos”.