A xunta de goberno local de Vigo deu este venres luz verde ao proxecto de implantación dun ascensor que unirá as rúas de Travesía e Aragón, á altura da igrexa de Santo Cura de Ars, salvando unha pendente vertical de dez metros.
“Iniciamos os ascensores e o Vigo Vertical entre Travesía de Vigo e a rúa Aragón. Este é o primeiro”, subliñou en rolda de prensa o alcalde, Abel Caballero, quen explicou que o elevador terá capacidade para 13 persoas.
Xunto co elemento mecánico, o Concello aproveitará a obra, que suporá un investimento de 721.000 euros, para renovar as redes de saneamento de auga e de rega, e tamén cambiará a rede de iluminación pública e as canalizacións de saneamento, sumidoiros, pozos e arquetas de conexión.
Por outra banda, Caballero inaugurou este venres a humanización realizada na avenida de García Barbón, entre a rotonda con Rosalía de Castro ata Isaac Peral, cun orzamento de 2,1 millóns de euros. En total, o investimento nesta rúa xa alcanza os 6,7 millóns. “É unha humanización colosal”, reivindicou o rexedor vigués.