InicioEconomíaFAO defende en Vigo o papel do peixe nunha nutrición sustentable, nun...

FAO defende en Vigo o papel do peixe nunha nutrición sustentable, nun congreso con presenza da Raíña Letizia

Conxemar pide rebaixar ao 4 % o IVE do peixe e as administracións destacan a súa relevancia na saúde da poboación

PUBLICADO O

A organización para a nutrición das Nacións Unidas, FAO, así como científicos e autoridades, defenderon este luns en Vigo o papel do peixe e dos alimentos acuáticos nunha nutrición sustentable a nivel mundial, na inauguración do IX congreso FAO-Conxemar que serve de ‘pistoletazo’ de saída á celebración da feira internacional de produtos do mar conxelados, Conxemar.

A súa Maxestade a Raíña Letizia asistiu á inauguración do evento, no Auditorio Mar de Vigo e, aínda que non interveu, mostrou coa súa presenza o seu apoio o traballo da FAO no seu camiño para acabar coa fame no planeta.

A Raíña, Embaixadora Especial de Nutrición da FAO, entrou no Auditorio acompañada polo ministro de Agricultura, Pesca e Alimentación, Luís Planas; polo presidente da Xunta, Alberto Núñez Feijóo; polo alcalde de Vigo, Abel Caballero, e polo presidente de Conxemar, José Luís Freire. Antes de asistir á inauguración da xornada, saudou aos organizadores do Congreso e ao equipo de Conxemar, así como aos relatores que participan neste foro.

Na inauguración do Congreso, os asistentes puideron escoitar a mensaxe do director gerenal da FAO, Qun Dongyu, quen advertiu de que “o mundo non está encamiñado a cumprir” o compromiso de acabar coa fame e a desnutrición en 2030, polo que instou a “transformar” os sistemas agroalimentarios e facelos máis sustentables e eficientes.

Respecto diso, asegurou que o peixe e as proteínas mariñas están chamados a ser unha compoñente chave neses sistemas alimentación, grazas aos seus compoñentes nutricionais e ao seu baixo impacto ambiental, e poden axudar a acabar coa fame. Por iso, lembrou que a acuicultura xoga un papel fundamental no novo Marco Estratéxico 2022-2031 da FAO.

PESCA SUSTENTABLE, GARANTE DA SEGURIDADE ALIMENTARIA

Pola súa banda, o ministro de Agricultura, Pesca e Alimentación, Luís Planas, sinalou que os sistemas agroalimentarios inclusivos e sustentables supoñen unha oportunidade para cumprir os Obxectivos de Desenvolvemento Sustentable e o Acordo de París e, nese sentido, son fundamentais accións como, por exemplo, a loita contra a pesca ilegal. “Os recursos pesqueiros sustentables xogan un papel chave como garantes da seguridade alimentaria mundial e provedores de proteína de alta calidade”, destacou o ministro.

Así mesmo, incidiu en que a lei de pesca sustentable e investigación pesqueira que se está tramitando “vai ser un instrumento eficaz para apoiar esa aposta polo futuro” e o seu obxectivo é “modernizar o sector, asegurar a súa continuidade e lograr o aproveitamento óptimo dos recursos”.

Ese marco normativo, engadiu, pon o foco na substitución xeracional, a mellora das condicións nos buques, o avance na investigación, a potenciación do asesoramento científico e a optimización do consumo enerxético.

IMPACTO SOCIO CULTURAL E RELEVANCIA SANITARIA

Mentres, o presidente da Xunta, Alberto Núñez Feijóo, destacou na súa intervención o impacto social, cultural e económico da actividade pesqueira en Galicia, onde a cadea mar-industria xera máis de 9.000 millóns de euros de facturación e 50.000 empregos.

Pero ademais diso, subliñou a “relevancia sanitaria” do consumo de peixe e da dieta atlántica, en todas as idades, para lograr unha nutrición adecuada e para a prevención de enfermidades. De feito, recalcou, “a dieta atlántica asóciase cunha menor mortalidade” e o peixe é “un reductor do gasto sanitario”.

O presidente de Conxemar, José Luís Freire, aproveitou a súa intervención para pór en valor o papel do complexo mar-industria e dos alimentos acuáticos na saúde, aínda que lamentou que a Comisión da UE non incluíse o peixe na súa listaxe de alimentos, dentro das súas estratexias sobre sustentabilidade e boas condutas no Pacto Verde.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...