O ministro Ábalos pon o mes de xullo como data para implantar as bonificacións da AP-9

Ábalos concretou un esquema que "xa está moi perfilado" e que é "coincidente en gran medida" coa proposta que expón o Goberno galego.

A AP-9 ao seu paso pola ponte de Rande. EUROPA PRESS - Arquivo

O ministro de Transportes, José Luís Ábalos, avanzou que espera implantar no mes de xullo as bonificacións da autoestrada AP-9, no marco dun calendario “ambicioso” no que agora “o importante é avanzar na negociación coa concesionaria”, Audasa.

Trasladouno nunha comparecencia ante os medios de comunicación en Santiago ao termo dunha longa reunión co presidente da Xunta, Alberto Núñez Feijóo. Ábalos concretou parte dun esquema que “xa está moi perfilado” e que é “coincidente en gran medida” coa proposta que expón o Goberno galego.

Así, ademais da bonificación do 100% das viaxes de volta para turismos con dispositivo electronico (sen requirir ningún tipo de recurrencia e todos os días da semana, desde a primeira viaxe), o “gratis total” para o tramo Vigo-Redondela e os referidos a vehículos pesados (en liña co que representan na recadación da concesionaria), anunciou un desconto adicional do 20% para os usuarios que realicen máis de 20 viaxes mensuais en calquera tramo (bastarían 10 ao mes de ida e volta) e outra do 50% (tamén a maiores) en Vigo-Tui.

“Seguimos traballando nalgúns detalles para poder converxer de modo máis definitivo”, sinalou o titular de Transportes, en alusión ao documento que lle trasladou o Executivo autonómico. Pola súa banda, o titular do Goberno galego, “satisfeito” porque o Executivo central “está a cumprir, celebrou este compromiso a pesar de sinalar que a el lle gustaría “máis en xuño” que en xullo, aínda que se conformou con que esas bonificacións estean implantadas ao comezo do verán.

Por outra banda, a preguntas dos xornalistas, foi o secretario de estado –presente na reunión de traballo– quen contestou que a auditoría sobre o estado da autoestrada aínda non se terminou.

Estamos a traballar nun marco de bonificacións sen precedentes. O maior da historia nunha autoestrada en Galicia, pero tamén en España. Ao redor de 60 millóns de euros anuais, uns 1.500 millóns de euros en total, ata o fin da vida da concesión”, proclamou o ministro, sobre un tema que cualificou como “prioritaro e crítico” para a comunidade. “Estamos a envorcar todos os nosos esforzos”, remachou. Por último, o ministro José Luís Ábalos referiuse a a existencia de “algúns puntos crave” que confía en “que se resolvan ben pronto”.

DE MADRUGADA E FAMILIAS NUMEROSAS

Pola súa banda, Núñez Feijóo comentou que no encontro expuxo “a posibilidade” de aplicar un desconto tamén a vehículos “que utilizan a autoestrada desde as 00,00 ás 6,00”, xa que de madrugada teñen “máis dificultades” para circular.

Vinculado co problema demográfico fixo alusión ao “desconto adicional” que a Xunta propón para as familias numerosas. “Son dous flocos que temos aí”, destacou. Á marxe disto, valorou que haxa unha “proposta conxunta para facer un prego de bonificacións conxunto e ter a seguridade de que quede ata o ano 2048”, algo que ve “determinante”, posto que “hai que avanzar na transfrencia” da AP-9.

Por ese motivo é polo que Feijóo ve “lóxico que eses descontos os xestione a comunidade autónoma” nun futuro, “e por tanto” estar “desde o principio” na formulación das bonificacións, “o que despois tocará xestionar”.

Respecto diso, lembrou a reuníon que pediu ao ministro de Política Territorial, Miquel Iceta, da comisión de transferencia “para avanzar” na relativa á AP-9 en paralelo aos debates que se dean no Congreso.

Esta transferencia “non é fácil”, resaltou Feijóo e é necesario “completar a autoestrada”, en referencia ao nó de bombeiros de Pontevedra, a ampliación de capacidade de Alfonso Molina na Coruña e o tramo urbano de Vigo. “Será unha transferencia laboriosa complexa e de enorme transcendencia económica”, remarcou. Nesta liña, tamén apuntou á autorización do ministerio para conectar a Vía Ártabra coa autoestrada, para poder entrar nela desde Lorbé.

DEIXAR UN COMENTARIO

Please enter your comment!
Please enter your name here