A Xerencia de Urbanismo do Concello de Vigo tomou coñecemento este martes da incoación do expediente para modificar o Plan Especial de Bouzas e regularizar a situación de 24 parcelas na fachada marítima deste barrio.
Así o anunciou o alcalde, Abel Caballero, quen explicou que esta actuación prevé regularizar a situación dunhas parcelas situadas en 4 mazás, entre a igrexa de Bouzas e a Urbanización Sotavento, ao amparo dunha disposición transitoria da Lei de Costas que xustificaría a excepcionalidade no que respecta ás edificacións.
Segundo lembrou o rexedor, a actual situación remóntase ao ano 2002, cando se aprobou o Plan Especial de Bouzas, que outorgou unha edificabilidade correspondente a unha zona de dominio portuario. En 2006, sendo Caballero presidente do Porto, se desafectou esa fachada marítima, que pasou á cidade e a ser de dominio público marítimo terrestre.
A partir dese momento, e coa aplicación da Lei de Costas, considérase que as construcións non poden estar a menos de 20 metros da liña de mar en chan urbano consolidado. “Pero a lei contempla unha excepción (nunha disposición transitoria), e cremos que aí entra a fachada marítima de Bouzas”, sinalou Caballero.
Por iso, o Concello modificará o Plan Especial para adaptalo ás consideracións recollidas na disposición transitoria. Neste proceso serán necesarios varios informes que haberá que pedir tanto á administración central como á Xunta.