O BNG presentou este luns en Vigo as súas emendas aos orzamentos da Xunta para 2021, que recollen un aumento dos investimentos na cidade olívica por uns 105 millóns de euros, para facer fronte aos efectos da pandemia, reforzar os servizos públicos e atender a “necesidades infraestructurales”.
Nunha rolda de prensa, a deputada nacionalista Carmela González lembrou que esta formación presentou unha emenda á totalidade dos orzamentos autonómicos, porque é necesario pór en marcha un “ambicioso” plan de reconstrución, con medidas específicas de rescate de sectores como o comercio e a hostalaría.
A ese respecto, e tras recalcar que as contas presentadas polo goberno de Feijóo son “unha oportunidade perdida”, a deputada e o concelleiro nacionalista Xabier Pérez Igrexas sinalaron que as emendas parciais presentadas polo BNG con respecto á cidade de Vigo pretenden “impugnar e pór fin á política de total abandono que a Xunta do PP practica contra a principal cidade de Galicia”.