O reitor da Universidade de Vigo (UVigo), Manuel Reigosa, sinalou que asinou un convenio coa Fundación Mentor para “impulsar a investigación” na institución educativa e “potenciar un programa de formación para estudantes”.
No marco da rúbrica co presidente da Fundación Mentor e director executivo de Zendal, Andrés Fernández; o reitor asegurou que este acordo marco, de catro anos de duración, “responde á vocación” da universidade de “manter unha relación constante coa sociedade” e “estreitar lazos” coa empresa.
Nesta liña, precisou que se busca “potenciar ao máximo as capacidades da formación académica de excelencia” pola que aposta a universidade e lembrou que este convenio oficializa unha “colaboración” coa Fundación Mentor xa existente.
Así, Manuel Reigosa concretou que permitirá un traballo conxunto para “impulsar a investigación que se fai na UVigo” e “potenciar un ambicioso programa orientado á formación complementaria dos seus estudantes”.