Caballero recoñece que non pode oporse ao novo recheo no porto “se se fai de acordo coa lei”

O rexedor lamentou que a ría de Vigo xa ten "máis recheos dos que pode soportar", aínda que precisou que iso non se debe ao actual presidente da Autoridade Portuaria, Enrique López Veiga, cuxa xestión á fronte do organismo eloxiou.

O alcalde de Vigo e presidente da FEMP, Abel Caballero, durante a rolda de prensa. CONCELLO DE VIGO

O alcalde de Vigo, Abel Caballero, admitiu este venres que non poderá oporse ao novo recheo anunciado polo Porto, para gañar 8.300 metros cadrados na terminal de Pesca, “se se fai de acordo coa lei”, aínda que reiterou o seu rexeitamento a este tipo de intervencións na ría.

Nunha rolda de prensa, e preguntado polos medios acerca desa obra, que xa conta co visto e prace do Ministerio para a Transición Ecolóxica, Abel Caballero, sinalou que descoñece os pormenores desa actuación (que permitirá ampliar a lonxa), pero proclamou que estará “sempre vixiante para que non haxa máis recheos” na baía viguesa, que é un “ecosistema moi delicado”.

“Permanecerei moi atento para que non haxa nin un só recheo máis, pero non poderei oporme se (esa obra) faise de acordo coa lei, e ten o visto e prace dos responsables de Medio Ambiente”, engadiu.

O rexedor lamentou que a ría de Vigo xa ten “máis recheos dos que pode soportar”, aínda que precisou que iso non se debe ao actual presidente da Autoridade Portuaria, Enrique López Veiga, cuxa xestión á fronte do organismo eloxiou. “Está a facer un bo traballo no Porto”, aseverou.