A Xunta volve pedir ao Concello de Vigo que axilice as expropiacións no Casco Vello

A conselleira Ángeles Vázquez recorda que o Goberno galego non pode adquirir diversos inmobles, e debe ser o Concello o que expropie para poder avanzar na rehabilitación.

A conselleira de Medio Ambiente, Territorio e Vivenda, Ángeles Vázquez, visita un edificio rehabilitado no Casco Vello de Vigo, en compañía da delegada da Xunta, Marta Fernández Tapias, e do portavoz municipal do PP, Alfonso Marnotes / MVR.

A Xunta de Galicia instou este luns novamente ao Concello de Vigo a axilizar as expropiacións de inmobles no Casco Vello para dar “continuidade” ao labor rehabilitador do Consorcio. Así o trasladou a conselleira de Medio Ambiente, Territorio e Vivenda, Ángeles Vázquez, nunha visita a un dos inmobles rehabilitados no barrio histórico, na rúa Cruz Verde.

Vázquez subliñou que o Consorcio Casco Vello (participado nun 90 por cento pola Xunta de Galicia e nun 10 por cento polo Concello) quere manter o seu labor de recuperación desa zona da cidade, e pediu máis colaboración á administración municipal.

A ese respecto, a conselleira enviou unha mensaxe ao goberno de Vigo: “Se o Concello tivese a ben facer as expropiacións, habería continuidade na rehabilitación do Casco Vello”.

Segundo lembrou Vázquez, por distintos motivos, a Xunta non pode adquirir diversos inmobles, e debe ser o Concello o que expropie para poder avanzar na rehabilitación.

Con respecto ao edificio que visitou este luns, trátase dun inmoble con dúas vivendas e un local comercial, cuxas obras finalizaron no verán.

Segundo Vázquez, o Consorcio do Casco Vello leva investidos 27 millóns de euros en rehabilitación de edificios para vivendas e locais. Neste momento, ten en marcha obras por valor de case 3 millóns de euros na zona alta do Casco Vello e na contorna do Berbés.