O Porto de Vigo acudirá aos tribunais se os sobriños de Carmen Franco non renuncian a vender os terreos sobre os que se asenta o Museo de Rande, ‘Meirande’, cuxa titularidade se atribúen e que a Autoridade Portuaria cualifica como “de dominio público”.
Así o trasladou o presidente do Porto de Vigo, Enrique López Veiga, quen confirmou que, tras tentar o cambio de titularidade no rexistro sen éxito, dirixiuse á familia Martínez Bordiu para solicitarlle que modifique a anotación catastral na que eses terreos figuran como da súa propiedade.
Segundo explicou López Veiga, o museo e os terreos lindeiros están en dominio público portuario e, en concreto, o centro de interpretación, está cedido en réxime de concesión ao Concello de Redondela. Para o presidente portuario é “inexplicable” que se puidesen rexistrar como propiedade desa familia.
Por iso, indicou que, se os Martínez Bordiu non aceptan o cambio no catastro, o Porto “irá a un litixio”. “E gañarémolo”, resolveu.
