Zona Franca de Vigo publica información fiscal sobre as principais empresas galegas

A base de datos ofrece información sobre 20.000 empresas. ZONA FRANCA

O Consorcio da Zona Franca de Vigo puxo a disposición das persoas interesadas unha base de datos con información sobre as 20.000 empresas galegas que presentaron unha maior facturación en 2018.

Segundo indicou a entidade nun comunicado, esta iniciativa busca facilitar a adopción de decisións económicas, para o que ofrece a posibilidade de acceder a datos de empresas a través da aplicación de filtros sectoriais e xeográficos, entre outros.

O delegado do Estado na Zona Franca, David Regades, precisou que a base de datos de ARDÁN, que se ofrece nun formato descargable, permite seleccionar fichas de empresa e listaxes, ademais de exportar os datos a follas de cálculo. En concreto, o custo deste servizo ascende a 99 euros.

Os datos económicos reflectidos foron obtidos mediante os depósitos das Contas Anuais (Balance, Conta de PyG, Memoria e Informe de Xestión) indicados nos Rexistros mercantís das provincias galegas para garantir a súa fiabilidade.