A Policía Local de Tui (Pontevedra) remitiu á Subdelegación do Goberno unha denuncia contra unha entidade bancaria ante as colas que de persoas se forman no exterior a consecuencia de que só abre ao público dous días á semana.
Diso informou o Concello nun comunicado remitido aos medios, no que detalla que hai varias semanas que os axentes observan estas colas na oficina situada na rúa Colón. A Policía Local censura que os clientes queden “expostos” no exterior desta entidade bancaria durante o tempo de espera e que non poidan “estar confinados nos seus fogares”.
“A apertura a diario da oficina ou da outra sucursal que a mesma entidade ten no concello permitiría axilizar a atención ao público e, deste xeito, evitar as colas e esperas dos clientes no exterior”, sostén a Policía Local, que critica que as colas se poden prolongar “ata dúas horas”.
O Consistorio explica que os feitos foron postos en coñecemento da dirección da sucursal “sen que polo momento se apreciara ningún cambio no horario” da oficina nin tampouco a apertura da outra existente.
