A Xunta de Galicia constatou este venres que o Goberno de Vigo modificou a ordenanza do IBI para cobrar este imposto á sociedade concesionaria do Hospital Álvaro Cunqueiro, tras o intento errado de facerlle pagar antes, co argumento de que é un centro privado: “O alcalde de Vigo modifica a ordenanza cando os xulgados non lle dan a razón”.
Así o transmitiron fontes autonómicas tras facerse pública unha sentenza na que o Tribunal Superior de Xustiza de Galicia (TSXG) avala o pago dese imposto por parte da concesionaria, iso si, desde o exercicio 2019, cando a ordenanza foi modificada.
A ese respecto, o Goberno galego lembrou que os tribunais desestimaron o intento do Concello de cobrar o IBI nos exercicios de 2015 a 2018, xa que neses anos a ordenanza municipal establecía que os centros do Sergas de titularidade pública estaban exentos de pago.
Segundo a Xunta, “o que ocorreu” é que o consistorio olívico non puido percibir eses ingresos, a pesar da súa insistencia en tramitalos coma se o hospital fose unha entidade privada, porque os xulgados “acreditaron a plena titularidade pública do Sergas sobre o cento por cento do inmoble”.
Tras a modificación da ordenanza, o Concello dispuxo que só quedarían exentos do IBI os centros de saúde de Atención Primaria nos que tanto o titular como o suxeito pasivo (o que ten que pagar o imposto) sexa público. Por iso, o TSXG avala que a concesionaria debe pagar o IBI desde a entrada en vigor da nova normativa, o que supón o pago duns 970.000 euros anuais.
“Lamentamos que o resto de concellos, con independencia da cor política, asinen convenios de exención do IBI para os centros de saúde e hospitais, e en Vigo o Goberno local siga sen colaborar co hospital público da cidade”, afirmaron fontes da Xunta.
Finalmente, as mesmas fontes matizaron que a sentenza do TSXG responde a un recurso interposto pola concesionaria contra a modificación da ordenanza fiscal. A Xunta, pola súa banda, tamén recorreu esa modificación, e aínda está pendente de sentenza.
