Un proxecto buscará impulsar a actividade loxística para potenciar a internacionalización de empresas da Eurorrexión

O titular autonómico de Economía, Emprego e Industria, Francisco Conde, durante o acto de presentación

O proxecto CoLogistics, presentado este mércores en Vigo, naceu co obxectivo de potenciar a internacionalización e a presenza no exterior do tecido produtivo da Eurorrexión Galicia-Norte de Portugal mediante o impulso da actividade loxística.

Para iso, a iniciativa, que conta cun orzamento de 2,2 millóns de euros, buscará tamén fortalecer as capacidades organizativas e tecnolóxicas da loxística, segundo trasladou a Consellería de Economía, Emprego e Industria nun comunicado.

En concreto, o proxecto conta coa participación da Confederación de Empresarios de Pontevedra, que lidera a iniciativa, a Xunta, a Autoridade Portuaria de Vigo, a Associação Empresarial de Portugal, a Administración dos portos do Douro, Leixões e Viana do Castelo e a Cãmara Municipal de Vilanova de Famalição. Ademais, está financiado polo programa Interreg V A España-Portugal (POCTEP), que promove iniciativas de cooperación transfronteiriza e recibe apoio europeo.

Durante o acto de presentación, o titular autonómico de Economía, Emprego e Industria, Francisco Conde, resaltou que CoLogistics permitirá relacionar a loxística coa competitividade do tecido produtivo galego e detallou que a iniciativa se centra nunha “reformulación” do sector que aspira a convertelo nun “referente” da loxística europea.