O presidente da Xunta, Alberto Núñez Feijóo, informou da aprobación dunha nova liña de préstamos para apoiar ás empresas auxiliares do sector naval. Co foco posto na situación do estaleiro vigués de Barreras, defendeu que o reto é apoiar a esta industria, que conta coa segunda maior carteira de pedidos de toda Europa.
Así as cousas, tras a reunión semanal do seu Executivo e antes de seguir cos actos electorais previos ao 10N, remarcou que estas axudas facilitarán o financiamento ás empresas da industria naval que poidan estar a sufrir atrasos nos pagos debido ás dificultades, por exemplo, de Barreras e a deriva ” do seu conflito accionarial”.
Estarán incluídas no programa de préstamos directos para o financiamento que ten activo o Igape, cun orzamento conxunto de 36 millóns de euros ata 2021. Ademais, ao longo da súa intervención, o presidente da Xunta explicou que, grazas a esta liña, facilitarase a concesión de préstamos comprendidos entre os 50.000 euros e un millón, e indicou que o prazo de amortización será de cinco anos.
O obxectivo da Xunta é que esta liña de crédito permita mellorar a situación financeira dos provedores de bens e servizos dos estaleiros. O prazo para presentar as solicitudes activarase “de inmediato” e seguirá aberto ata finais de 2020.
NAVANTIA
Feijóo tamén defendeu que o Executivo autonómico “aposta” pola industria naval desde o ano 2009, momento no que o sector atravesaba “importantes dificultades”. A modo de exemplo, esgrimiu que “loitou” por Navantia, buscáronse solucións para o ‘tax lease’ e tentouse conseguir máis pedidos.
Agora, lembrou que, coa “axenda galega” con 25 reivindicacións que a Xunta fixo pública a pasada semana, esíxese carga de traballo para cubrir o baleiro de actividade xerado polo “atraso” dos contratos das fragatas F-110.
PLAN DE ORDENACIÓN DE SAN FIZ DE ASMA
Por outra banda, o Consello da Xunta aprobou este xoves o decreto polo que se publica e disponse a urxente ocupación de bens e dereitos afectados polo proxecto de construción da senda peonil entre Trasouto e Alto da Portela, en Bueu. Tamén autorizou a transferencia a favor do Concello da Merca dun tramo antigo da estrada OU-540.
Finalmente, deu luz verde á redacción do Plan de Ordenación do medio físico da parroquia de San Fiz de Asma, en Chantada. Trátase dun do dez proxectos que a Consellería de Medio Ambiente recolle no Plan de acción estratéxico para a Ribeira Sacra, co que se pretende promover o máximo coidado e respecto por unha zona de alto valor ambiental e cultural.
Este plan ten por obxecto fixar a ordenación integrada deste ámbito tendo en conta as súas especiais características naturais, ecolóxicas e paisaxísticas, que “compatibilice” a súa protección con “a máis racional explotación dos recursos”.
