O presidente da Xunta, Alberto Núñez Feijóo, trasladou este luns o “compromiso” do Goberno galego coa obra de ampliación do Instituto Feiral de Vigo, Ifevi, reclamada pola Asociación Conxemar, e sinalou que, a mediados de decembro, a Xunta estará en disposición de solicitar licenza ao Concello para iniciar os traballos de inmediato, e que estean listos para a edición de 2020.

Así o explicou o mandatario galego tras manter unha reunión coa directiva de Conxemar, á que informou dos prazos para tramitar esa ampliación, que suporá gañar outros 5.000 metros cadrados no recinto feiral.

Segundo sinalou Feijóo, a Xunta xa convocou o concurso para adxudicar o proxecto básico e proxecto construtivo da obra, que se resolverá a mediados de novembro. A partir de aí, a empresa adxudicataria terá un mes para redactar o proxecto.

Nese momento, a administración autonómica dirixirase ao Concello de Vigo para solicitar a licenza, e o consistorio terá que buscar o xeito legal de tramitar dita licenza pola vía de urxencia, en función do interese xeral da obra.

Se non se outorga esa “licenza directa”, debería tramitarse a actuación ao amparo da lei 3/2016, xa que o Plan Xeral de Ordenación Municipal de Vigo está anulado polos tribunais. Entón, precisou Feijóo, “empezarían uns prazos que prexudican a todos”, e sinalou que ve “moi difícil” que, por esta vía, a ampliación do Ifevi poida estar lista para a próxima edición da feira Conxemar, en outubro de 2020.

“NON HAI PROBLEMA ORZAMENTARIO”

Con respecto á dotación orzamentaria para levar a cabo esa obra, Núñez Feijóo puntualizou que as partidas consignadas en orzamentos son “orientativas” (para o 2020 contémplase unha dotación de 100.000 euros para a ampliación do Ifevi) e garantiu que a Xunta porá a disposición “os 4 ou 5 millóns” que custe a ampliación do recinto.

“Non hai un problema orzamentario, nin de prioridade política”, incidiu, e recalcou, en alusión ás críticas do alcalde, Abel Caballero, pola suposta falta de compromiso orzamentario, o seu “compromiso” de que se tramitará a obra e executarase “todo o diñeiro que sexa necesario”.

Así, Feijóo recalcou que, en canto a Xunta dispoña da licenza municipal urxente e do chan (debe expropialo a administración municipal), poderá empezar a obra, e a ampliación estará lista para a próxima edición de Conxemar.

LICENZA

Con respecto a esa licenza, o presidente galego recalcou a necesidade de que sexa tramitada pola vía de urxencia, algo que depende da “autoridade urbanística” neste caso, é dicir, do Concello de Vigo. “Sen licenza non se pode empezar a obra”, apostilou.

No caso de que o permiso non se tramite por esa vía urxente, a actuación debería realizarse ao amparo da lei 3/2016 (como xa se fixo coa anterior ampliación do Ifevi, entregada fai algo máis dun ano).

Nese escenario, os prazos serían máis amplos, posto que habería que solicitar informes tanto da Xunta como da administración central, e habería que someter a actuación a información pública. En todo caso, Feijóo prometeu que, se se recorre a esta solución, os informes que dependan do Goberno galego evacuaranse “no menor prazo posible”. “Pola Xunta non vai quedar. Eses 5 millóns estarán a disposición, o único impedimento que pode haber é a licenza”, remarcou.

ACCESOS

Pola súa banda, o presidente de Conxemar, José Luís Freire, lembrou que o “obxectivo” desta organización é que o Ifevi teña eses 5.000 metros cadrados adicionais para a próxima edición do certame, algo “absolutamente imprescindible” porque, en caso contrario, a feira corre “riscos moi serios” ante a competencia da Seafood de Barcelona.

Cuestionado acerca dos deficientes accesos ao recinto e as aglomeracións e problemas de tráfico que se viven cada ano cando se celebra Conxemar, Freire subliñou que “o obxectivo fundamental e prioritario agora é a ampliación”.