A Cámara galega instou a Xunta a reclamar ao Estado a eliminación inmediata da peaxe de Redondela na AP-9 e a execución das obras compensatorias acordadas entre o Ministerio de Fomento e o Goberno local do municipio.
En concreto, foi aprobada por unanimidade unha proposición non de lei presentada polo grupo popular, e defendida polo deputado Alberto Pazos, na que se reclamaba darlle cumprimento ao acordo unánime adoptado polo pleno do Parlamento e ao compromiso asumido polo Goberno entón presidido por Mariano Rajoy.
Pazos arremeteu, especialmente, contra o que considera unha “burla” dos distintos gobernos socialistas aos veciños de Redondela sobre esta peaxe, como a ampliación de Rande ao seu paso por Chapela “sen unha soa medida compensatoria” adoptada “48 horas antes dunhas eleccións xerais”.
Tamén lamentou que tras 16 meses de Goberno tras a moción de censura non se saiba “nada” das obras de compensación de Redondela, entras as que se contemplaba a construción dun novo colexio, a reposición de viarios ou pantallas anti-ruído, entre outras; nin da eliminación da peaxe. “Os compromisos dun Goberno central deben ser asumidos por calquera Goberno”, sinalou.
