Os armadores insisten en pedir medidas transitorias ante o ‘brexit’

"Estamos abocados a unha situación moi complexa", lamentan os armadores, e reclaman "que impere a lóxica", que se implementen plans de continxencia e medidas para "salvar" a situación, "mentres se negocia outro acordo" pesqueiro.

Barcos de pesca de Altura © Miguel Nuñez

Os armadores de Vigo volveron a alertar este mércores das consecuencias dun ‘brexit’ “caótico” para este sector, nun escenario no que están en xogo os empregos de 1.700 tripulantes (duns 130 barcos) e outros 8.000 empregos en terra, e reclamaron de novo medidas transitorias “para salvar a situación” mentres non se negocia un novo acordo pesqueiro.

Así o trasladou, en declaracións aos medios, o responsable de Arvi, Javier Touza, antes de participar nunha xornada divulgativa sobre o ‘brexit’, que se celebrou na Cámara de Comercio de Vigo.

O representante dos armadores lembrou que a saída do Reino Unido da UE sen acordo afectará a uns 130 buques que faenan en augas de Gran Sol e nas Malvinas, e volveu a expresar a “enorme preocupación” do sector ante a “incerteza” actual.

Touza advertiu de que as alternativas postas sobre a mesa para estes barcos (trasladar a súa actividade a augas de Irlanda ou Francia) “poden xerar tensións” neses caladoiros, ademais dun “sobreesfuerzo” pesqueiro.

Por outra banda, ademais da “perda de competitividade” da frota, o presidente de Arvi alertou tamén sobre o impacto do ‘brexit’ en “toda a cadea mar-industria”, o que inclúe o sector de elaborados, frigoríficos, conservas, loxística e mesmo as industrias de construción naval e auxiliares.

“Estamos abocados a unha situación moi complexa”, lamentou, e reclamou “que impere a lóxica“, que se implementen plans de continxencia e medidas para “salvar” a situación, “mentres se negocia outro acordo” pesqueiro.