O presidente do Porto de Vigo rexeita a reapertura do paseo marítimo

Enrique López Veiga lembra que a situación de "indefinición" do convenio do paseo marítimo das Avenidas se solucionará en outubro.

Parte que se afundiu nas Avenidas, durante a celebración do Marisquiño / © Miguel Núñez.

O presidente da Autoridade Portuaria de Vigo, Enrique López Veiga, lembrou que a situación de “indefinición” do convenio do paseo marítimo das Avenidas se solucionará en outubro e remarcou que “non se pode volver abrir” debido ao seu “mal estado”.

López Veiga lembrou que a lei de procedemento administrativo limita os convenios similares ao de Abrir Vigo ao Mar a catro anos cunha prórroga máxima doutros catro, o que obriga a unha redefinición do relativo ao paseo marítimo, cuxa duración se alonga ata os 50 anos. Así, apuntou que, se non se resolve esta situación, o acordo disolverase o 1 de outubro deste ano.

Ademais, volveu responsabilizar ao Concello olívico do mantemento do paseo, do que parte se afundiu en agosto de 2018 durante a celebración do Marisquiño, e subliñou o interese do Porto por asumir de novo a conservación deste espazo para afrontar así o arranxo da zona e disolver o convenio.

En canto ás negociacións coas demais partes implicadas en Abrir Vigo ao Mar –o Concello e o Consorcio da Zona Franca de Vigo– recoñeceu que existen “discrepancias”, aínda que volveu incidir na “vontade” de diálogo.

No entanto, si rexeitou unha vez máis unha obra “fastuosa” e avogou por unha reconstrución do paseo marítimo de acordo co proxecto inicial. Tamén lembrou que o mal estado da zona non foi causado polo paso de pezas pesadas cara ao Porto, argumentación sostida polo Concello, xa que “sempre estivo presente”.

Ademais, apuntou que non se opón á reforma do aparcadoiro robotizado exposta pola Zona Franca para a súa transformación nun espazo de estacionamento convencional, aínda que indicou que a concesión se esgotará nuns anos.

INCENDIO EN BOUZAS

Noutra orde de cousas, o presidente do Porto avanzou que se reuniu co director da planta de PSA Peugeot Citroën en Vigo, Ignacio Bo, quen lle transmitiu que o número de automóbiles afectados polo incendio que tivo lugar como consecuencia do lanzamento pirotécnico non autorizado realizado o pasado venres en Bouzas podería ascender a 200.

Así, lembrou que se produciu despois de que unha furgoneta accedese ao paseo marítimo a pesar de que se atopaba pechado ao paso e realizase unha tirada de artefactos pirotécnicos a uns 20 metros da zona na que se atopaban varios vehículos depositados para ser embarcados. En principio, os coches que non poderán ser vendidos ascenden a 40, aínda que non se descarta que haxa máis afectados.