A Comisión Europea anunciou este luns a apertura dunha investigación en profundidade para avaliar se o plan de España de conceder 20,7 millóns en axudas á planta de PSA Peugeot Citroën en Vigo cumpre coas normas europeas sobre axudas de Estado con finalidade rexional.
España notificou en novembro de 2017 ás autoridades europeas a súa intención de conceder 20,7 millóns en axudas públicas a esta planta dentro do seu proxecto para investir 500 millóns en novas liñas de produción para lanzar novos vehículos e en melloras do proceso produtivo da fábrica. Os traballos en ambos os casos comezaran en abril de 2015.
“A Comisión investigará meticulosamente se as axudas previstas de España son realmente necesarias para que Peugeot invista en procesos de produción verdadeiramente innovadores en Vigo e se van desenvolver a rexión sen falsear indebidamente a competencia ou ir en detrimento da cohesión na UE”, resumiu a comisaria de Competencia, Margrethe Vestager.
A danesa subliñou que o investimento público “é importante para fomentar o crecemento económico das rexións desfavorecidas en Europa”, pero o Executivo comunitario debe “evitar as competicións prexudiciais” entre os países do bloque comunitario.
Os Estados membros poden impulsar o desenvolvemento económico e o emprego de rexións consideradas como “desfavorecidas” e fomentar a cohesión rexional a través de axudas públicas, pero para poder ser aprobadas por Bruxelas deben cumprir determinadas condicións. Por exemplo, deben incentivar o investimento privado, limitarse ao mínimo necesario e non atraer investimento dunha rexión igual ou máis desfavorecida doutro socio comunitario.
SOSPEITAS
En concreto, o Executivo comunitario ten a sospeita de que estas axudas poden atraer o proxecto de investimento en detrimento doutra rexión europea máis desfavorecida. Tamén pensa que PSA podería realizar o investimento en Vigo sen a necesidade de que houbese axudas estatais.
Bruxelas tamén dubida de que o novo proceso de produción na planta sexa o suficientemente innovador como para que a empresa poida acollerse á excepción das normas que permite conceder axudas públicas a proxectos de grandes compañías en instalacións xa existentes.
Ademais, a Comisión non está convencida da contribución desas axudas ao desenvolvemento rexional, así como da súa idoneidade e proporcionalidade. Por último, non pode descartar que teñan efectos negativos na competencia de determinados segmentos do mercado de turismos.
