A Plaforma pola defensa da Ría de Vigo oponse a máis recheos

Este colectivo lembrou que a superficie gañada ao mar xa ascende a 3,2 millóns de metros cadrados.

Recheo de Bouzas da Zona Franca de Vigo / © Miguel Núñez.

A Plataforma pola defensa da Ría de Vigo ‘Cíes’ reiterou este mércores o seu rexeitamento aos recheos portuarios na baía, unha práctica que considera “xa superada” e apostou por “axilizar” a Plisan para mellorar a competividade do Porto.

Este colectivo lembrou que a superficie gañada ao mar xa ascende a 3,2 millóns de metros cadrados, que “se estivesen dedicados totalmente á actividade portuaria, serían máis que suficientes”.

A Plataforma sostén que “non é razoable” seguir aterrando a ría, onde “xa se eliminaron os mellores bancos marisqueiros, pesqueiros e mesmo areais”, e advertiu de que a mellora da competitividade do Porto de Vigo pasa por “axilizar” a Plataforma Loxística Industrial de Salvaterra-As Neves (Plisan).

Este posicionamento prodúcese tras coñecerse a intención do Porto olívico de gañar uns 65.000 metros cadrados adicionais en Bouzas, e mesmo a posibilidade de encher outros 50.000 metros cadros na zona do peirao de Comercio, unha práctica “depredadora”, segundo a Plataforma.

Finalmente, lembrou que a “volta” aos recheos na ría afectaría a recursos mariños, postos de traballo nos sectores de pesca e marisqueo, ao turismo e á calidade de vida, e suporía “alterar” a configuración natural da baía.