O Concello do Porriño, advertido pola Xunta por incumprir a regra de gasto

O Concello incumpriu a regra de gasto en case 4 millóns de euros.

Concello
Concello do Porriño / © Miguel Nuñez

O Concello do Porriño (Pontevedra) incumpriu a regra de gasto en case 4,05 millóns en 2018, polo que a Xunta instou o goberno deste municipio a realizar un axuste a través dun acordo de non dispoñibilidade de créditos (AND).

De tal forma, o plan de axuste deberá ser de case 4,16 millóns de euros para o ano de 2019, xa que á cifra de incumprimento de gasto debida débeselle aplicar o crecemento do Produto Interior Bruto (PIB) neste ano, un 2,7 por cento, para definir o importe do acordo de non dispoñibilidade de créditos.

Así se recolle na notificación trasladada polo Goberno galego ao municipio pontevedrés. Así, darase cumprimento á lei de estabilidade orzamentaria e sustentabilidade financeira.

O Executivo autonómico tamén recomendou ao municipio a adopción das medidas adicionais que considere precisas para garantir “unha situación de capacidade de financiamento” na liquidación de 2019 en relación coa estabilidade orzamentaria. O Concello poderá, no entanto, acreditar mediante un acordo no pleno que non é necesario aplicar medidas adicionais.

A Xunta ten a tutela financeira dos concellos, polo que cando se incumpre unha regra de gasto, é preciso realizar un plan económico e financeiro de cuxa vixilancia se encarga a institución autonómica. Fontes de Facenda explicaron que se trata dunha situación que afecta a arredor de medio centode municipios cada ano.