O seu nome estaba na lista de autoridaes que acudirían á entrega das Medallas da Asociación Nacional de Fabricantes de Conservas (Anfaco-Cecopesca). Pero non apareceu. O alcalde de Vigo, o socialista Abel Caballero, evitou así encontrarse co presidente da Xunta de Galicia, Alberto Núñez Feijóo –co quen mantén de longo unha agria disputa política– e con parte da plana maior do PP.
O certo é que a marca PP dominou o acto, coa presenza de Ana María Pastor Julián (ex-ministra e presidenta saínte do Congreso dos Deputados; Miguel Ángel Santalices Vieira, presidente do Parlamento de Galicia; Rosa Quintana Carballo, conselleira do Mar; Jesús Vázquez Almuíña, conselleiro de Sanidade, e Pedro Sanz Alonso, vicepresidente primeiro do Senado. Só a presenza de Fernando González Laxe (ex-presidente da Xunta polo PSdeG e un dos recoñecidos este ano coas Medallas de Anfaco-Cecopesca) podía supor un ‘alivio’ para Caballero. Pero o alcalde, segundo puido saber este xornal por fontes próximas, esgrimiu “problemas de axenda” para non acudir ao acto.
A ‘morbosa’ foto de Caballero e Feijóo xuntos –ou cando menos preto o un do outro– non se deu. A última vez que coincidiron foi nun acto celebrado en febreiro pasado na delegación do Goberno galego na cidade olívica, para presentar as obras da nova estación de autobuses de Vigo, que estará integrada no complexo intermodal de Urzáiz (onde tamén se constrúe o novo centro Vialia, segundo o deseño de Thom Mayne). Aí, aparcaron as diferenzas que acostuman airear, no seu particular enfrontamento político.
Caballero evitou esta vez atoparse con Feijóo e foi o grande ausente do evento. A escusa é que tiña outros actos programados na súa axenda, pero o certo é que a súa presenza fora confirmada polos propios organizadores dos premios.
MEDALLAS
Anfaco-Cecopesca entregou a súa medalla de ouro ao Senado, galardón que recolleu o vicepresidente primeiro desta institución, Pedro Sanz.
As de prata recaeron na presidenta do Consello Económico e Social (CES) de Galicia, Corina Porro (ex-alcaldesa de Vigo polo PP), e no ex-presidente socialista da Xunta e catedrático de Economía Aplicada Fernando González Laxe.
A medalla de bronce foi para catro traballadores do sector en recoñecemento á súa dilatada traxectoria profesional, con máis de 45 anos de experiencia: María Luisa Lojo (Jealsa), Carmen Ferreiro (Calvo Conservas), Margarita Soñora (Conservas Friscos) e Julio Carril (Industrias Cerdeimar).