A alcaldesa do Porriño, Eva García da Torre, comprometeuse a porse en contacto coa dirección de Levantina e Asociados de Minerais nunha reunión co comité de empresa co fin de intermediar entre ambas as partes debido ao Expediente de Regulación de Emprego (ERE) extintivo anunciado pola compañía.
O delegado da Confederación Intersindical Galega (CIG) no comité de empresa, José Manuel Corbacho, explicou que o encontro coa rexedora tivo lugar tras unha concentración celebrada este xoves fronte ao Concello do Porriño.
Ademais, detallou que os próximos luns e martes terán lugar na sede da Generalitat Valenciana en Alacante reunións dos traballadores coa empresa co obxectivo de negociar as condicións do ERE, en concreto, o número de afectados e as indemnizacións. Se nestes días non se chega a un acordo, Corbacho detallou que o vindeiro mércores será unilateralmente o grupo alacantino o que decida os termos.
Trátase dun ERE a nivel estatal que, en principio, afectaría a 33 dos 134 traballadores do Porriño. Na última reunión, Levantina propuxo que esta cifra descendese a 25, aínda que o comité de empresa aspira a reducila a unha vintena.
Ademais, a empresa propón unha indemnización por despedimento de 23 días por ano traballado para os afectados e que a contía total non poida superar as 13 mensualidades.