PSA Citröen vendeu case o 25% dos coches que se matricularon en España

O grupo francés alcanzou o ano pasado o seu maior volume de vendas en España da última década.

Planta da fábrica de Citröen en Vigo

O Grupo PSA pechou 2018 como líder do mercado total español, con 328.488 matriculacións de turismos e vehículos comerciais, o que supón un incremento do 33,1% en comparación co exercicio precedente e permitiulle rexistrar unha cota do 24,1%.

A corporación francesa alcanzou así o seu maior volume de vendas en España dos últimos dez anos, segundo datos presentados en Madrid polo director xeral de Comercio do consorcio automobilístico francés para España e Portugal, Christophe Mandon.

Mandon destacou que PSA soubo adaptarse en 2018 aos “sobresaltos” que produciron no mercado a entrada en vigor (o pasado 1 de setembro) do novo protocolo WLTP. Toda a gama do grupo xa cumpre coa norma Euro 6.2 e grazas a iso a penetración de mercado da compañía no territorio nacional pasou do 21% no período comprendido entre e agosto ao 22,4% no último cuadrimestre do ano.

“Este liderado é froito do forte dinamismo de Grupo PSA ysus catro marcas (Peugeot, Citroën, DS Automobiles e Opel). Soubemos competir con éxito grazas ao despregamento dunha ofensiva de produto sen precedentes, que soubo responder as necesidades tanto para os clientes particulares como de empresas, e ao noso compromiso coa rede comercial”, subliñou o directivo.

Mandon indicou que España ten máis peso para a multinacional francesa que para o mercado europeo e que é o país con mellor cota de mercado para a compañía logo de Francia. En 2018, o mercado nacional adiantou ao italiano no ranking de vendas europeas.

O director xeral de Comercio do consorcio automobilístico PSA Citröen para España e Portugal, Christophe Mandon

No mercado de vehículos comerciais, o Grupo PSA matriculou 76.584 unidades en 2018 en España, o que se traduce nunha cota do 35,1%. Peugeot e Citroën foron as marcas líderes da compañía neste segmento. Por marcas, Peugeot pechou o curso pasado liderando o mercado total de turismos e vehículos comerciais, con 132.805 matriculacións e un crecemento do 12,7% respecto de 2017.

Ademais, a firma do león foi a máis demandada nas canles de particulares e empresas, así como do segmento de todocaminos, mentres que Citroën entregou máis de 104.000 vehículos (+9%), unha cifra que non alcanzaba en España desde 2010 e que lle outorga representatividade no mercado total do 6,8%.

DS Automobiles terminou o ano anterior con 4.325 matriculacións, o que se traduce nunha subida do 17,7% en comparación con 2017. O DS 7 Crossback foi o seu modelo máis vendido, con 2.020 unidades comercializadas.

PRIMEIRO ANO COMPLETO DE OPEL EN PSA

Pola súa banda, Opel, que en 2018 cumpriu o seu primeiro ano completo integrada no Grupo PSA, se focalizó o exercicio pasado na execución do seu plan estratéxico PACE!, logrando matricular 87.351 unidades, un 5,7% de cota de mercado.

En 2018, PSA adquiriu o 100% de Emov, tras dous anos do seu lanzamento. A firma de ‘car sharing’ conta actualmente con máis de 200.000 usuarios e unha flota de 600 Citroën C-Zero 100% eléctricos en Madrid e 150 en Lisboa.

DEIXAR UN COMENTARIO

Please enter your comment!
Please enter your name here