Folga en Vitrasa

Autobus vitrasa en vigo
Autobús de Vitrasa / Miguel Nuñez

A asemblea de traballadores de Vitrasa aprobou convocar paros parciais a partir de outubro, os martes e xoves, para denunciar “irregularidades”, a “alta temporalidade”, “rotación do cadro” e “exceso de horas extra”. Segundo a Unión Sindical Obrera (USO), van protestar ante os “múltiples incumprimentos que a compañía vén perpetrando nos últimos anos”.

Despois dunha asemblea que comezou a pasada noite ás 23.30 horas e se prolongou até case as dúas da madrugada, os traballadores decidiron, por 98 votos a favor, 35 en contra e sete nulos, iniciar estes paros, tras resultar “infrutuosos” tanto os anteriores intentos de negociación como as mobilizacións.

Previamente, o comité de empresa —USO, CC.OO., UGT e CIG— iniciou en setembro unha serie de concentracións que “non serviron para desatascar o conflito”, polo que agora deciden intensificar as protestas.

Entre as “irregularidades”, din que a empresa “utiliza traballadores eventuais en rotación para cubrir postos de traballo fixos, evitando así o pago da antigüidade e asegurándose que estarán sempre dispoñibles para calquera servizo, ante o medo a non ser renovados”. “Este tipo de contratación fraudulenta xa o denunciamos ante a Inspección de Traballo“.

Os traballadores tamén critican a “excesiva temporalidade” e as xornadas “abusivas” que “exceden o cómputo de horas e neutralizan os tempos de descanso”, así como “outros moitos incumprimentos, como en materia de saúde laboral, con falta de baños polo menos nas cabeceiras das liñas, ou un plan de igualdade caducado desde hai anos e sen visos de ser renovado”.

Queda por determinar a data de inicio destes paros parciais.

DEIXAR UN COMENTARIO

Please enter your comment!
Please enter your name here