O Marisquiño celebrará competicións virtuais de deportes de risco abertas a afeccionados e profesionais

Os interesados en participar deberán gravar un vídeo do seu truco sen música e subilo a Instagram mediante unha publicación temporal na que deberán etiquetar O Marisquiño e utilizar o 'hashtag' #OMRAW.

O Marisquiño 2017 / © Miguel Núñez

O Marisquiño celebrará unha competición virtual de ‘skate’ e BMX que contará co patrocinio do Xacobeo 2021 e estará aberta ao público, a #OMRAW, aínda que tamén disporá dun espazo no que se enfrontarán os gañadores das dúas últimas edicións, o Prol Vídeo Contest.

A iniciativa #OMRAW representa un novo concepto de competicións dixitais que busca mostrar o talento do público e os profesionais, así como ofrecer pezas inéditas de acción.

Deste xeito, os ‘riders’ de Skate e BMX que mostren os seus trucos en vídeo poderán optar a premios cuxa contía sumará 4.000 euros. O certame dividirase en catro roldas de 10 días cada unha que se celebrarán ata o 3 de setembro.

Tras a finalización de cada fase, un xurado composto pola dirección deportiva do Marisquiño e representantes do sector decidirá o truco de cada categoría que accede ao último encontro, que terá lugar entre o 4 e o 7 de setembro. Así, os catro finalistas enfrontaranse a través de votacións que se realizarán en Instagram e que permitirán a repartición dos premios por categorías.

Os interesados en participar deberán gravar un vídeo do seu truco sen música e subilo a Instagram mediante unha publicación temporal na que deberán etiquetar O Marisquiño e utilizar o ‘hashtag’ #OMRAW.

Ademais, a organización do festival de cultura urbana presentou o Prol Vídeo Contest, unha nova competición virtual na que os gañadores das edicións 2018 e 2019 do Marisquiño enfrontaranse con pezas inéditas de acción.

Profesionais como Danny León, Courage Adams, Lara Lessmann e Keet Oldenbeuving comezaron a preparar os vídeos que se publicarán nas próximas semanas. O público do Marisquiño decidirá os gañadores de #OMRAW nas súas respectivas categorías.

En concreto, a primeira batalla de BMX no marco da #OMRAW enfrontará a Viki Gómez e o gañador de 2019, Alberto Moya, e o seu vencedor coñecerase este mércores.