A organización do XXIII Festival de Monicreques de Redondela Memorial Juanjo Amoedo presentou este martes a programación completa do evento, que terán lugar do 12 ao 17 de maio, con máis de 60 funcións e actividades complementarias.
O director da Axencia Galega das Industrias Culturais, Jacobo Sutil, destacou o labor de promoción e “dignificación” do teatro de monicreques por parte do festival redondelano, e o valor engadido das súas actividades formativas e divulgativas.
Ademais, puxo en valor a importante presenza de compañías galegas na súa programación, ademais de funcións doutras compañías de numerosos puntos de España, e de países como Portugal, Arxentina, Eslovenia, Francia, Israel ou Italia.
Como en anos anteriores, o multiusos da Xunqueira será sede da programación en sala, e haberá numerosas actuacións e funcións ao aire libre. Ademais, Redondela contará coa instalación Ingenii Machina, da compañía Alauda Teatro, co mercado e coa habitual sección ‘Monicreques pola Gorra’, ademais dunha exposición sobre os 40 anos de traxectoria de Tanxarina Monicreques.