O Concello de Vigo solicitará 3,5 millóns de euros ao Ministerio de Transportes, Mobilidade e Axenda Urbana (Mitma), no marco do Plan de Recuperación, Transformación e Resiliencia, para rehabilitar o Pazo da Raposeira e para acometer melloras no Pazo Quiñones de León en Castrelos.
Así o confirmou en rolda de prensa o alcalde, Abel Caballero, que concretou que se destinarán 1,9 millóns a recuperar o Pazo da Raposeira, en Sárdoma. Neste caso, actuarase sobre a edificación e sobre a leira, e destinarase cando estea terminado a uso cidadán.
No caso de Castrelos, pediranse 1,6 millóns de euros para a renovación da carpintaría e para a mellora da eficiencia enerxética do inmoble. Así mesmo, instalarase un sistema de climatización para garantir a conservación das obras de artes e o benestar dos visitantes.
Por outra banda, o rexedor informou da licitación do contrato de mantemento da iluminación pública, que terá un custo duns 3 millóns de euros anuais, e lembrou que o goberno local xa está a acometer a mellora da iluminación na cidade, coa renovación de 4.000 puntos de luz e un orzamento de 2,1 millóns de euros.