O goberno municipal de Vigo non votará nin abordará a cesión dun local do Casco Vello para instalar unha sede do Centro Galego de Arte Contemporánea (CGAC) ata que o Consorcio acepte tratar a súa proposta de alugar 14 baixos no barrio histórico.
Así o trasladou este mércores a concelleira de Urbanismo, María Xosé Caride, quen explicou que este xoves haberá unha reunión do Consello de Administración do Consorcio do Casco Vello (organismo participado nun 90 por cento pola Xunta e nun 10 por cento polo Concello).
Segundo denunciou a edila socialista, “de novo a presidenta do Consorcio (e delegada da Xunta, Marta Fernádez-Tapias) decidiu ignorar a petición do Concello” de cesión de 14 locais, durante 10 anos prorrogables, a cambio dun aluguer de 30.000 euros anuais.
Caride sinalou que eses baixos, que “hai máis dun ano que están abandonados”, deben acoller actividades culturais, asociativas e outras iniciativas para “dinamizar” o barrio histórico de Vigo, polo que “mentres non se incorpore esa petición do goberno local, feita en tempo e forma, non hai lugar á votación nin posicionamento do Concello sobre a cesión á Xunta dun local para a sede do CGAC”.
A concelleira de Urbanismo matizou que o goberno local non se opón a que o Centro Galego de Arte Contemporánea teña unha sede no Casco Vello, pero reclamou “un trato igualitario”, e lembrou que, mentres que o Concello está disposto a pagar por alugar os baixos solicitados, a sede do CGAC sería unha cesión gratuíta á Xunta.
“O Concello pretende que os locais desocupados sexan de utilidade á cidade (…) e non entendemos por que se nos nega esa posibilidade. Mentres o Consorcio non aborde este tema, o Concello non pode apoiar a iniciativa da Xunta”, sentenciou Caride.
SEDE DO CGAC EN VIGO
A construción dunha sede do CGAC no Casco Vello de Vigo, concretamente no Berbés, foi unha iniciativa anunciada polo propio presidente da Xunta, Alberto Núñez Feijóo, a principios de 2020.
Naquel momento, o alcalde da cidade, Abel Caballero, mostrouse disposto a que se abrise esa sede, pero reclamou un convenio para que tivese o orzamento adecuado (polo menos medio millón de euros ao ano) e, posteriormente, esixiu que o espazo destinado a esa delegación do CGAC fose máis amplo.
