Aisha Rey, alumna de Belas Artes na UVigo, impulsa un club de lectura aberto ao alumnado da facultade e a calquera persoa interesada co obxectivo de “promover un hábito de lectura, crear comunidade arredor dela e diversificar o tipo de libros que le cada membro”, salienta Rey.
“Penso que nestes momentos tan turbulentos e solitarios a lectura sería un bo salvavidas para a xente, non só a nivel cultural, senón tamén para crear comunidade e ampliar círculos sociais entre a xuventude”, defende Rey.
Esta iniciativa, manterá “aberta permanentemente” a súa inscrición, a través do seu perfil de Instagram e, por mor da situación sanitaria, desenvolverá as súas xuntanzas de forma virtual, a través da rede social Discord, “varias veces ao mes se é posible”, explica a alumna.
XUNTANZAS VIRTUAIS
Nestas xuntanzas virtuais comentarase o capítulo ou capítulos asignados para a sesión, “respondendo a preguntas abertas e comentando as impresións de cada membro”, explica a impulsora desta iniciativa. E o libro será escollido polos membros do club a partir dunha serie de opcións propostas por Rey.
Esta iniciativa, xurdida da iniciativa persoal desta estudante e membro da delegación de alumnado, súmase aos clubs de escritura, cómic ou baile impulsados nos últimos anos polo alumnado de Belas Artes.