O Festival de Cans, entre os catro mellores eventos culturais de Galicia en 2020

Sitúase só por detrás da Cidade da Cultura, a feira de industrias culturais Culturgal e o Centro Galego de Arte Contemporánea.

Presentación da edición de 2020 do Festival de Cans, marcado pola Covid-19 / Europa Press.

O Festival de Cans foi seleccionado como un dos eventos culturais mellor valorados de Galicia en 2020, segundo o informe anual da Fundación Contemporánea, unha das entidades culturais de maior prestixio de España.

Esta fundación, que ten a súa sede en Madrid, realiza este informe anual do que denomina ‘principais insignias culturais’, recollendo as opinións dun milleiro de expertos de prestixio no campo cultural en toda España, entre os que están representantes de fundacións, directores de grandes museos, produtores, promotores, xestores culturais e representantes de diferentes administracións.

En Galicia, o Festival de Cans ocupa o cuarto lugar en prestixio e valoración, só por detrás de grandes institucións como a Cidade da Cultura, a feira de industrias culturais Culturgal e o Centro Galego de Arte Contemporánea, de Santiago de Compostela.

Neste cuarto lugar, ademais de Cans, empatan a puntos o Teatro Rosalía de Castro e o Festival S8 de Cinema Periférico da Coruña, xunto co Festival Curtocircuito, de Santiago de Compostela.

DEIXAR UN COMENTARIO

Please enter your comment!
Please enter your name here