A XXXVII Mostra Internacional de Teatro Cómico e Festivo de Cangas celebrarase entre o 9 e o 18 de xullo tras ser posposta varias semanas debido á crise sanitaria da COVID-19.
Así o detallou o director da Axencia Galega de Industrias Culturais (Agadic), Jacobo Sutil, acompañado por representantes das distintas institucións colaboradoras e o equipo artístico e de xestión do evento durante a súa presentación, realizada este martes na localidade pontevedresa.
Deste xeito, Jacobo Sutil valorou a celebración deste evento, cuxa consolidación destacou, e recoñeceu o compromiso dos profesionais do sector coa cultura. Tamén remarcou que os organizadores do encontro mantivesen nesta nova edición a calidade do teatro e a súa defensa na comunidade, así como a aposta por propostas doutros lugares, a implicación da cidadanía e a dinamización da localidade.
En concreto, a mostra teatral contará coas actuacións de 16 compañías escénicas, das que 10 serán galegas, e distintas actividades de formación e difusión relacionadas coa parte lúdica do teatro. Os espectáculos da comunidade incluirán varias estreas, ‘O Monte das Aras’, a cargo de Teatro de Ningures; ‘Hell Brothers’, por CirKompacto; ‘PYKA’, que interpretará Cinema Sticado, e ‘As boas actrices’, que representará Compañía 3.
Ademais, ofrecerase a posta en escena de ‘Commedia’, de Contraproducións; ‘Guerra de identidade’, de DeuVe; ‘Liberto’, de Rebordelos Teatro; ‘Só’, de Xanpatito Pato; ‘Dúas doas que bailan’, de Teatro do Atlántico, e ‘As virxes salvaxes’, de Teatro do Noroeste.
Así mesmo, a mostra acollerá representacións de compañías non galegas. Deste xeito, poderase asistir á representación de ‘Napoleão’, de Companhia do Chapitô (Portugal); ‘Dolce Salato’, da compañía Carpa Diem (Italia) e a coprodución galego-brasileira ‘Circo de Lume’, de Asasocirco. Tamén se ofrecerán a proposta italo-cántabra ‘Punto y Coma’, de El Cruce; a madrileña ‘The Pimitals’, de Producións Yllana e Primital Bross, e ‘Tonbola’, a cargo da compañía vasca HIKA Teatroa.
Adicionalmente, celebrarase o IV Torneo de Dramaturxia, que contará coa colaboración do Centro Dramático Galego. Así, María Lado, Roberto Salgueiro, Marta Pérez e Fernando Castro Paredes competirán neste certame, que conducirá Esther F. Carrodeguas.