Abel Caballero volve insistir no localismo e ataca a Santiago: “O Camiño terá sinalización propia en Vigo”

O alcalde de Vigo reprocha á Xunta que "só fale" do Xacobeo e non apoie o Nadal de Vigo, "un destino turístico total".

Abel Caballero, alcalde de Vigo / Paula Justo -EUROPA PRESS

O alcalde de Vigo, Abel Caballero, cargou este mércores contra a Xunta de Galicia que, ao seu xuízo, “só fala do Xacobeo”, e nese contexto asegurou que o Ano Santo “é Santiago” e que en Galicia “hai máis que Santiago e o Camiño de Santiago”.

Así respondía Caballero nunha rolda de prensa ás palabras do conselleiro de Cultura, Román Rodríguez, que este mércores visitou Vigo con motivo da presentación da Federación Portuguesa dos Camiños de Santiago e lamentou as “dificultades” e os “impedimentos” que o Concello de Vigo pon para sinalizar o Camiño portugués.

Estas declaracións tiveron unha inmediata contestación de Abel Caballero, quen asegurou que Vigo terá “pronto” a súa propia sinalización do Camiño, que será “acorde” coa cidade, a pesar de que Román Rodríguez indicou este mércores que a Xunta pretende colocar a sinalización “oficial”.

Neste sentido, o alcalde vigués destacou que “o Xacobeo é Santiago” e que en Galicia “hai máis que Santiago e o Camiño de Santiago”, polo que afeou á Xunta a falta de “apoio” ao Nadal de Vigo, que é, ao seu xuízo, “un evento turístico de ámbito español e europeo”. “Só falan do Xacobeo”, lamentou Abel Caballero.

Non vexo ningunha promoción da Xunta desta cidade, que se está convertendo nun destino turístico total”, criticou o rexedor vigués, que asegurou que o presidente da Xunta, Alberto Núñez Feijóo, “ría das luces de Vigo”. “Non o esquezan nunca. Quedóuselle o riso conxelado”, sentenciou.

PROMOCIÓN DE VIGO

Abel Caballero continuou ironizando con que Rodríguez non viñese a Vigo a promocionar a cidade senón “a dicir como promociona Santiago”. “O conselleiro de Cultura debe crerse que Vigo non é Galicia. Unha vez máis”, apostilou.

Tamén indicou que Román Rodríguez podería vir á cidade a dicir como vai apoiar o aeroporto de Vigo, “porque apoia ao de Santiago. “Vén aquí a falar de Santiago, do aeroporto de Santiago, do turismo de Santiago, de que vaiamos todos a Santiago. A Xunta de Galicia débese crer que en Vigo somos parvos”, sentenciou.