Marta Lucio volverá á dirección do Museo do Mar de Galicia, en Vigo, tras o seu paso pola Cámara Alta (onde foi senadora do PP desde xaneiro de 2016 e ata marzo de 2019), segundo aprobou este venres o padroado da Fundación Museo do Mar.
Así, tras este período de tres anos, nos que o museo estivo dirixido de forma provisional polo arqueólogo conservador Vicente Caramés, Marta Lucio volverá incorporarse á dirección da institución.
A Xunta de Galicia enmarcou o retorno de Lucio (licenciada en Xeografía e Historia, e especialista en Historia da arte, Arte Antiga e Medieval) nun momento no que o Goberno galego fai unha aposta “por conseguir unha mellor definición da realidade museística co impulso do anteproxecto de lei de museos de Galicia“.
Este documento compleméntase coa próxima Estratexia da Cultura Galega. Trátase dun plan no que se recollen as principais liñas de actuación e as prioridades das políticas culturais de Galicia, e que “marca a folla de ruta para afrontar os retos da cultura galega para os próximos anos”.