O Festival de Cans internacionalizase coa participación do cineasta alemán Hannes Stöhr

O cineasta aleman Hannes Stöhr / Festival Cans. FESTIVAL DE CANS

O cineasta alemán Hannes Stöhr (Stuttgart, 1970) asistirá ao Festival de Cans, que se celebrará no Porriño (Pontevedra) do 22 ao 25 de maio, onde se proxectarán as súas catro longametraxes.

Deste xeito, o evento aspira a combinar a visibilización do traballo de directores procedentes de distintos países ligados a Galicia co protagonismo dos creadores da comunidade nas seccións competitivas, segundo trasladaron os organizadores nun comunicado.

O director alemán abordará a súa profesión xunto á presidenta da Asociación Galega de Profesionais da Dirección e Realización, Ángeles Huerta, e o realizador Jorge Coira no Café con CREA desta edición, que terá lugar no Baixo de Moncho o día 23 de maio.

Hannes Stöhr, que se formou na Deutsche Filme e viaxou por distintos países para estudar idiomas, conectou en Santiago de Compostela con actores como Miguel de Lira, Luís Tosar e Branca Cendán (que formarían parte do elenco do seu filme ‘Galatasaray-Dépor’), así como con directores como Jorge Coira, na década dos 90.

FILMOGRAFÍA

Tras o seu regreso a Alemaña, obtivo, entre outros galardóns, o Premio Panorama do Público pola súa película ‘Berlin is in Germany‘ no Festival Internacional de Cinema de Berlín, Berlinale, en 2001. Este filme transcorre nesta cidade alemá despois da súa reunificación tras a caída do muro.

O seu segundo proxecto, ‘One Day in Europe’ (2005), traducido como ‘Galatasaray-Dépor’, estreouse no mesmo festival e presenta catro historias que suceden en distintos países durante o día dunha hipotética final da liga de Campións da UEFA entre o Galatasaray de Istambul e o Deportivo da Coruña.

Ademais, no festival do Porriño, poderase gozar de ‘Berlin Calling’ (2008), unha longametraxe sobre a vida do DJ Martin Karow estreada no Festival de Locarno, e do filme ‘Global Player’ (2013), que non se proxectou nas salas españolas e que aborda a influencia da globalización nunha pequena empresa familiar alemá.