O Goberno da Deputación de Pontevedra esixiu ao alcalde de Baiona, Anxo Rodal (PP), que retire a Fernando Sánchez Dragó do cartel do ciclo de conferencias da Festa da Arribada.

A deputada de Igualdade, Isaura Abelairas, pediu a Rodal que “desista da impresentable elección do homófobo Fernando Sánchez Dragó como cabeza de cartel do ciclo da Festa da Arribada”.

Abelairas manifestou que é “incomprensible e bochornoso” que Rodal permita que “un individuo que alardea publicamente de encontros sexuais con menores de idade, que insulta ás mulleres e que nega a violencia machista sexa conferenciante da Arribada, ensuciando unha festa tan importante para a provincia”.

Así, a deputada reclamou ao alcalde “que reflexione e que cambie a súa decisión para non avergoñar aos veciños de Baiona que non merecen isto”. Abelairas lembrou as “obscenas declaracións do escritor para un movemento tan importante como o feminismo, a súa defensa da prostitución, as súas palabras de respaldo do golpe de estado do réxime franquista e os seus insultos á democracia”.

Por último, Isaura Abelairas apuntou que “o alcalde está a tempo de rectificar e mostrar que non se sitúa nas terribles trincheiras dos que apelan a nostalxia do peor dos séculos pasados”.

CRÍTICAS DO GRUPO SOCIALISTA

A agrupación socialista de Baiona tamén censurou a elección de Sánchez Dragó e manifestou, a través dun comunicado, o seu “máis absoluto rexeitamento á participación” do escritor e esixiu a Rodal que “dea marcha atrás e retire o nome do polémico escritor de forma inmediata”.

O portavoz socialista, Carlos Gómez, afirmou que “é absolutamente incrible que o alcalde escollese como cabeza de cartel do ciclo a un individuo da catadura moral de Sánchez Dragó”. Os socialistas sinalaron que é un home que “se vangloria publicamente de encontros sexuais con nenas de 13 anos, machista, xenófobo e homófobo”. Gómez asegurou que é “inconcibible que se poida dar cabida en Baiona a persoas deste calado”.

Ademais, o portavoz comentou que “a literatura non está por encima da consideración moral das persoas, e non se pode dar cabida a unha persoa que nas súas palabras ofende, denigra e pisa continuamente os dereitos e liberdades de calquera colectivo que conforma a sociedade”.

Por último, Carlos Gómez, que lamentou que o alcalde non consultase a decisión, afirmou que “parece que a Rodal traizóalle o subconsciente e aínda pensa en Baiona en branco e negro”.