Dan por controlado o incendio de Salvaterra tras arrasar 350 hectáreas

Para o seu control, mobilizáronse ata o momento 12 axentes, 38 brigadas, 23 motobombas, dúas pas e dous helicópteros.

Incendio en Mondariz en imaxe de arquivo/ @Davidemanzaneda

Os dous grandes incendios forestais quedaron controlados nesta madrogada do luns en Galicia logo de arrasar conxuntamente máis de 500 hectáreas. En concreto, o de Salvaterra de Miño, Pontevedra, afecta provisionalmente a unha superficie de 350 hectáreas mentres que o de Folgoso do Courel, en Lugo, leva arrasadas 160.

Así o informa nun comunicado a Consellería do Medio Rural, que indica que o de Salvaterra iniciouse ás 21,51 horas da noite do sábado na parroquia de Uma, aínda que agora tamén afecta os municipios veciños de Mondariz e Covelo. Dada a magnitude deste lume e a súa rápida propagación ao longo da noite, chegouse a declarar a situación 2 ao redor da 1,00 da mañá pola proximidade das chamas ao núcleo de Maceiras, en Salvaterra, e posteriormente aos de Mouriscados, Fontebalán e Crespos, en Mondariz. Con todo, esta medida quedou suspendida ás 7,26 da mañá.

As últimas estimacións de Medio Rural sitúan a superficie queimada por este incendio nunhas 350 hectáreas. Para o seu control, mobilizáronse ata o momento 12 axentes, 38 brigadas, 23 motobombas, dúas pas e dous helicópteros.

Segundo medicións provisionais, o lume de Folgoso do Courel afecta a unha superficie dunhas 160 hectáreas. Ata o momento, mobilizáronse un técnico, 11 axentes, 32 brigadas, 14 motobombas, unha pa, oito avións e dous helicópteros.

DEIXAR UN COMENTARIO

Please enter your comment!
Please enter your name here