A Banda de Música Xuvenil de Xinzo foi convidada este sábado 20 de outubro pola Fundación Reveriano Soutullo a participar na celebración do 89 aniversario do pasodobre “Puenteareas”.
A Banda de Xinzo interpretou o pasodobre xunto ao monumento do mestre Soutullo, situado diante do edificio consistorial do Concello de Ponteareas.
Javier Blanco, Director da Banda de Xinzo, quixo agradecer publicamente o labor que está a realizar a Fundación Reveriano Soutullo en favor da recuperación de toda a súa obra escrita para banda de música, así como a estreita relación que manteñen coa asociación.
“Ademais, para a nosa agrupación é moi positivo participar neste tipo de actos tan necesarios e simbólicos, xa que nos serve para transmitir a todos os músicos a importancia de Soutullo na composición bandística do noso país”, subliñou.
A Fundación Soutullo colabora regularmente coa Banda de Música Xuvenil de Xinzo, mostra disto é a última edición do CD composto integramente por obras inéditas do mestre D. Reveriano Soutullo Otero que saíu á luz a finais do ano 2014.