O Goberno galego financiará esta actuación, cuxa licitación se prevé nas vindeiras
semanas, mediante a achega económica de máis de 316.000 euros. O proxecto ten por obxecto a mellora da intersección existente no núcleo de Guillarei, pola que se accede á depuradora e á praia fluvial.
Actualmente a intersección ten visibilidade reducida e os vehículos que proveñen da Rañada ou Caldelas de Tui non poden xirar cara á vía de acceso á depuradora. A rotonda deseñarase de xeito que permita a continuidade do itinerario peonil e
ciclista existente na vía de acceso á depuradora, para o que na marxe dereita se construirá un carril bici de 2,5 metros e unha senda de 2 metros.
As obras compleméntanse coa instalación dos elementos necesarios para garantir a
drenaxe axeitada e coa iluminación da glorieta.
O Consello da Xunta autorizou xa o proxecto de decreto polo que se declara en
concreto a utilidade pública e se dispón a urxente ocupación dos bens e dereitos
afectados pola construción dunha glorieta de acceso á estación depuradora de augas
residuais de Guillarei, na estrada PO-404, no Concello de Tui.
