A rexedora de Tomiño, Sandra González, mantivo unha reunión co presidente da Xunta, Alberto Núñez Feijóo, na que reafirmou a disposición da Xunta a construír un polígono agroforestal neste municipio, na zona dos Panascos, e que se dedicaría á produción de planta ornamental, hortofruticultura e viveiros.

Ademais, ambos repasaron outras actuacións neste concello do Baixo Miño, como as obras de mellora en varios centros educativos; a execución da Vía de Alta Capacidade entre Tui e A Guarda, que pasa por Tomiño; ou o apoio da Xunta para que o Parque da Amizade teña recursos do fondo europeo Next Generation.

Por outra banda, e ante a preocupación expresada pola alcaldesa debido ás listas de espera na Atención Primaria, Feijóo asegurou que a Xunta está a traballar para paliar a falta de profesionais no servizo, aínda que insistiu en que é un problema estendido por todo o Estado e que require da “implicación” do Goberno central para a súa solución.