A Garda Civil detivo na Guarda a unha nova, de 22 anos, á que sorprenderon cando tentaba romper o portelo dun coche que estaba estacionado na vía pública.
Segundo informou o corpo a través dun comunicado, os feitos sucederon este luns pola mañá, cando recibiron unha alerta cidadá que informaba de que “a plena luz do día” unha persoa estaba a tentar romper o portelo dun turismo aparcado nas inmediacións dunha parada de bus.
Unha patrulla que se atopaba preto do lugar sorprendeu á muller, que golpeaba o vehículo cunha pedra, coa suposta intención de romper o cristal da porta do copiloto.
A detida, de 22 anos, é veciña da Guarda e ten antecedentes policiais relacionados coa tenencia e consumo de estupefacientes, que sería detida por un suposto delito de tentativa de roubo con forza nas cousas.
Despois de ser trasladada ás dependencias do Posto da Garda Civil na Guarda, para ultimar a instrución das dilixencias, foi posta en liberdade coa obrigación de comparecer ante o Xulgado de Instrución de Tui cando sexa requirido.
