O Concello de Tomiño “pisa o acelerador” na limpeza de leiras para evitar que, un ano máis, o territorio do Baixo Miño quede sometido aos lumes dos meses de setembro e outubro. O consistorio vén de informar que, nas vindeiras semanas, comezarán a enviarse cartas ás persoas propietarias de fincas situadas nas faixas secundarias das parroquias de Santa María de Tomiño e San Pedro de Forcadela.
O obxectivo destas notificacións, que chegarán ás 1.961, é que os veciños propietarios destas leiras procedan á súa limpeza para evitar que sexan pasto dos lumes que adoitan chegar coa fin do verán. Segundo apuntan dende o consistorio, unha vez recibida a notificación, a persoa propietaria disporá de 15 días para limpar a parcela. “De non poder facelo, o feito de estar a finca situada nunha parroquia priorizada dálle ás persoas propietarias a vantaxe de poder adherirse a un contrato con Seaga para que o organismo se encargue deste labor. O importe por esta xestión será de 0,035 euros por metro cadrado, o que nunha finca duns 1.400 m2 suporía tan só uns 49 euros, un prezo substancialmente menor ao existente no mercado”, destacan.
“É moi importante que toda a veciñanza colabore nunha cuestión tan importante como o é a prevención dos incendios forestais mantendo limpas as parcelas situadas nas faixas secundarias, un labor no que se ben se debe incidir de xeito máis exhaustivo nas parroquias priorizadas, é unha obriga que afecta a todo o municipio”, comenta a concelleira de Medio Ambiente, Ana Belén Casaleiro González.