O Concello de Tui, a través da Red de Juderías, e na procura da promoción turística ao abeiro do “importante” conxunto patrimonial relacionado coa presenza xudía na cidade, organiza un obradoiro práctico denominado “Sabores de Sefarad” a cargo do cociñeiro Javier Zafra. O obradoiro terá lugar o luns 13 de setembro e está dirixido exclusivamente a profesionais da hostalaría e a restauración tudense.
Javier Zafra é autor do libro que dá nome a este obradoiro, e nel o cociñeiro recolle unha escolma de receitas ou komidikas facilmente realizables. Ademais, o chef xestiona o blog (tamén do mesmo nome) que pretende ser un lugar onde compartir os pratos cociñados, experiencias culinarias e vivencias dos profesionais que traballan arredor da gastronomía sefardí.
O concelleiro de Turismo e Camiño de Santiago, Laureano Alonso, convida aos establecementos de restauración abertos de Tui a este taller, que considera “de gran interese” para coñecer esta proposta gastronómica que ten como finalidade mellorar a oferta gastronómica e turística da cidade: “unha aspiración que nestes momentos de incerteza resulta imprescindible de acometer conxuntamente”.
