Un morto e 30 feridos, balance da explosión pirotécnica en Tui

A forte explosión produciuse nunha vivenda particular, propiedade dun familiar do dono dunha pirotecnia que fora clausurada, que foi precintada por orde xudicial. O estoupido escoitouse en todo o sur de Pontevedra.

Explosión dunha empresa pirotécnica en Tui.
Explosión de Tui / Miguel Núñez

A explosión rexistrada este mércores nun almacén pirotécnico en Tui (Pontevedra) provocou como mínimo un morto e 30 feridos —dos cales sete son menores—, segundo fontes oficiais consultadas por Xornal de Vigo. Europa Press eleva a catro as persoas falecidas.

O estoupido ocasionou cuantiosos danos materiais tanto na zona onde se produciu como en varios quilómetros á redonda, debido á gran magnitude da onda expansiva. Hai confirmados destrozos en catro vivendas da ‘zona cero’. A Delegación do Goberno en Galicia solicitou á poboación que libere os accesos para facilitar a actuación dos servizos de emerxencias.

Así o confirmou o alcalde de Tui, Carlos Vázquez Padín, quen explicou que o suceso tivo lugar nunha vivenda na parroquia de Paramos. Debido aos danos provocados pola explosión e ao incendio orixinado, aínda non se puido avaliar o alcance da devandita explosión, aínda que o 061 confirmou que hai varios feridos.

Tamén a Deputación de Pontevedra confirmou que a explosión causou lumes adxacentes e considerables danos materiais. E comunicou que no lugar estaban actuando catro helicópteros de extinción de lumes, ademais de helicópteros medicalizados con base en Santiago de Compostela e Ourense.

A onda expansiva chegou a ocasionar danos en locais en pleno centro de Tui, a varios quilómetros de onde se produciu a explosión, que se escoitou en practicamente todo o sur da provincia. De feito, a columna de fume xerada polo incendio era visible mesmo desde zonas altas de Vigo ou Redondela.

Na zona pódense observar as desfeitas nas casas próximas e abriuse un perímetro de seguridade por risco de explosión. Ademais, hai risco de contaminación por xofre na zona.

Emerxencias médicas sinalou que recibiu unha chamada sobre as 16:25 horas deste mércores por unha gran explosión en Paramos. O 061 mobilizou 2 helicópteros, tres ambulancias medicalizadas (procedentes de Vigo, Pontevedra e Mos), catro ambulancias asistenciais e un médico de Atención Primaria.

No operativo de emerxencias, baixo a coordinación de Vicepresidencia da Xunta, participan numerosos efectivos sanitarios, Policía, Bombeiros e Protección Civil, e levou a activar o nivel 1 do Plan Territorial de Emerxencias de Galicia (Platerga). Ademais, interveñen numerosos efectivos de Portugal.

A explosión e a onda expansiva derrubou varias casas na zona, rompendo cristais e derrubando tellados. Os danos son cuantiosos e varias vivendas estaban ardendo. “É como Chernobyl, non hai nada, non queda nada”, dixo unha testemuña presencial da contorna”, onde os danos se contan por centos.

A maiores, activouse un perímetro de seguridade tanto pola súa puidesen producirse novas explosións como polo xofre presente no aire.

En total, foron unhas 40 ambulancias as mobilizadas, evacuando a varios feridos, un deles grave. As casas máis próximas ao epicentro esnaquizáronse coa explosión, e a un home caeulle o tellado da súa casa. Polo momento non se contabilizaron vitímas mortais.

Así mesmo, a Garda Civil confirmou que varios efectivos deste corpo se desprazaron ao lugar, onde seguen traballando con membros de bombeiros e de Protección Civil.

A VIVENDA

A forte explosión produciuse nunha vivenda particular, propiedade dun familiar do dono dunha pirotecnia, que foi precintada por orde xudicial. Así o explicou o ex-alcalde de Tui, Enrique Cabaleiro, quen confirmou que el mesmo asinou a orde de precinto da devandita pirotecnia, situada en Baldráns (a uns poucos quilómetros da vivenda onde se produciu o suceso), en cumprimento dunha resolución xudicial por un contencioso derivado de problemas urbanísticos.

“Todo parece indicar que o responsable da empresa, unha vez que esta quedou precintada, trasladou a esa vivenda particular dun familiar ou ben a actividade ou, polo menos, o material pirotécnico para ser almacenado”, sinalou.

A explosión, que se escoitou en todo o sur da provincia de Pontevedra, produciuse sobre as 16.25 horas e a magnitude da onda expansiva provocou danos materiais moi importantes tanto na zona de Paramos (con numerosas vivendas afectadas) como noutras áreas máis afastadas.

De feito, tras a deflagración orixinouse un incendio e a columna de fume foi visible mesmo desde puntos altos de Vigo ou Redondela.

ATENCIÓNS ÁS VÍTIMAS

O Concello de Tui habilitou un punto de atención a afectados pola explosión así como un teléfono, o 9866070655.

Segundo informou o alcalde da localidade, Carlos Vázquez Padín, as persoas afectadas e os interesados poden dirixirse ao centro de atención instalado no Centro Cultural de Guillarei, ou chamar por teléfono.

AUTORIDADES DESPRAZADAS AO LUGAR

O vicepresidente da Xunta, Alfonso Rueda, desprazouse a Tui para facer o seguimento da situación. O seu departamento coordina o operativo.

Até o lugar está a desprazarse tamén o delegado do Goberno en Galicia, Santiago Villanueva. E do mesmo xeito que Rueda, ao lugar desprazouse a subdelegada do Goberno en Pontevedra, Ana María Ortiz, e o delegado da Xunta en Pontevedra, José Manuel Cores Tourís.

Fontes do Executivo autonómico confirmaron, do mesmo xeito, que tamén se desprazou a Vigo, ao Hospital Álvaro Cunqueiro, o conselleiro de Sanidade, Jesús Vázquez Almuiña.

Ademais, o presidente do Goberno de España, Mariano Rajoy, conversou co presidente da Xunta, Alberto Núñez Feijóo, para interesarse polo accidente pirotécnico.

DEIXAR UN COMENTARIO

Please enter your comment!
Please enter your name here