Dez feridos en accidentes rexistrados en Tui, As Neves, Moaña e Ponte Caldelas

Trafico motos da garda civil © Miguel Nuñez

Dez persoas resultaron feridas este venres en distintos accidentes de tráfico rexistrados nos municipios de Tui, As Neves, Moaña e Ponte Caldelas.

Cinco persoas, tres delas menores, necesitaron asistencia médica tras saírse da estrada co seu vehículo sobre as 17.15 horas, á altura do número 4 da rúa da Guarda, en Tui.

Por outra banda, tres persoas resultaron feridas nunha colisión na que se viron implicados un coche e unha furgoneta, na estrada que une Ponteareas e As Neves, sobre as 16.00 horas.

Previamente, pola mañá, unha colisión múltiple entre dous coches e un camión saldouse cunha persoa ferida, que tivo que ser evacuada ao Hospital Povisa. O choque produciuse na PO-551, concretamente no punto quilométrico 31, ao redor das 12.15 horas.

Por último, unha menor tivo que ser atendida polos servizos sanitarios despois de producirse unha colisión entre dous turismos en Ponte Caldelas. O sinistro tivo lugar no punto quilométrico 10,800 da PO-532, uns minutos antes das 17:00 horas.