InicioSociedadeAcepta case 5 anos de prisión o falso executivo de Apple que...

Acepta case 5 anos de prisión o falso executivo de Apple que estafou con mentiras máis de 100.000 euros

O home mantivo unha relación sentimental cunha farmacéutica da Guarda á que lle roubou 76.000 euros.

PUBLICADO O

Francisco Javier O.S., o acusado de facerse pasar por alto executivo de Apple para estafar case 106.000 euros a varias persoas na área de Vigo, recoñeceu os feitos e aceptou penas que suman case 5 anos de prisión, nunha vista de conformidade celebrada este mércores na sección quinta da Audiencia Provincial de Pontevedra, con sede na cidade olívica.

O procesado, que compareceu ante o tribunal por videoconferencia (está ingresado en prisión desde setembro de 2020) recoñeceu os feitos que se lle imputaban e aceptou 3 anos de cárcere e 1.540 euros de multa por un delito de estafa agravada en concurso medial cun delito de falsidade documental; e 21 meses de cárcere por un delito continuado de estafa.

Na sentenza, que xa foi ditada na sala, o tribunal ten en conta a circunstancia agravante de reincidencia (ten dúas condenas anteriores por estafa de tribunais de Cantabria e Cataluña), e a circunstancia atenuante de dilacións indebidas.

Ademais foi condenado a indemnizar ás súas vítimas e devolverlles as cantidades estafadas: máis de 76.000 euros a unha farmacéutica coa que mantivo unha relación, case 27.000 euros a un matrimonio propietario dunha cafetaría e á súa filla, 1.120 euros ao dono dunha tenda de telefonía móbil e tecnoloxía; 1.420 euros a un quinto prexudicado; e outros 485 euros á sexta vítima.

Segundo o escrito de acusación pública, Francisco Javier O.S. iniciou unha relación sentimental en abril de 2018 coa titular dunha farmacia da Guarda. Ante ela, presentouse como unha persoa con enormes posibilidades económicas, herdanzas, viúvo e cunha filla estudando nun internado de Londres, e asegurando que era director de Enxeñaría de Apple.

Cando se gañou a confianza e o agarimo da vítima, empezou a pedirlle diñeiro con diversas escusas, que a muller lle entregou crendo que llo devolvería.

TRANSFERENCIAS

Así, nos meses seguintes, a muller transferiulle 6.000 euros para unha reparación do coche do acusado; 2.000 euros, despois de que lle propuxese irse a vivir con el a un chalé que alugara; outros 12.379 euros para a suposta adquisición dun lote de produtos de Apple que el conseguiría a bo prezo, dada a súa presunta condición de directivo da compañía; 1.750 euros para a matrícula da súa filla no centro de Londres; ou 53.000 euros para as xestións de cancelación dunha falsa hipoteca dun inmoble de Londres.

Así mesmo, segundo a Fiscalía, o acusado entregou o vehículo da muller para comprar outros dous coches (por 18.000 e 22.500 euros respectivamente), un dos cales lle asegurou que poría ao seu nome, pero nunca cumpriu a súa palabra e vendeuno a un terceiro.

A isto súmanse outras dúas transferencias que o acusado se fixo a si mesmo por valor de 1.940 euros, e a contratación dun cartón bancario sen autorización da titular da conta, que era a farmacéutica. De feito, a vítima decatouse desta xestión cando recibiu un aviso do banco pola falta de pagamento do cartón.

Cando a muller lle reclamou a devolución do seu diñeiro, o acusado elaborou uns documentos falsos, que simulaban ser comprobantes de transferencias do BBVA e que sumaban 65.000 euros, pero esas transferencias non existiron. Do mesmo xeito, mostrou tanto á muller como ao arrendador do chalé onde vivían varias nóminas falsas.

A relación a vítima finalizou en abril de 2019, cando o acusado lle anunciou que abandonaba o chalé e que estaría un tempo fóra, ilocalizable, “para desconectar”.

OUTRAS VÍTIMAS

Paralelamente, o acusado tamén enganou a outras persoas, ante as que tamén se presentou como alto directivo de Apple, ‘marido’ da farmacéutica da Guarda, e dono dun chalé en Oia.

O procesado gañouse a confianza dun matrimonio propietario dunha cafetaría, e fíxolle crer que, como executivo de Apple, podería conseguir un lote de produtos desta marca a moi bo prezo, que podería vender cun alto beneficio. Así, conseguiu que lle entregasen 13.480 euros.

O agora condenado foi máis aló e, alegando que outro directivo da empresa deixara ‘libre’ outro lote, ofreceullo a unha filla do matrimonio, a cambio doutros 13.480 euros. Posteriormente, mostrou ás vítimas xustificantes falsos do diñeiro entregado e doutros 9.000 euros de supostos beneficios pola venda de cada lote, pero ningún recuperou ningunha cantidade.

Do mesmo xeito, logrou enganar a varias persoas máis, ás que ofrecía teléfonos, portátiles e outros produtos, entre eles ao responsable dunha tenda de tecnoloxía. Ningún recibiu a mercadoría nin recuperou o seu diñeiro.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...